Kategoria Poezi 2017 Të Tjera

Kodi 13-27/ 2017

Do të ikim      

kur peshku të ngordhë në akuarium

dhe murin ta mbulojë myshku i zi

kur unë të shoh përditë e më pak

përditë e më shumë kur të thinjesh ti

kur akrepat e orës të ndalin rrotullimin

dhe njerëzit të mbushin valixhet plot

ne do të hyjmë në bankën e kohës

këtë herë për të vjedhur dhe pakëz kohë

kur fëmijët tanë të jenë aq larg sa s’thuhet

ne do të mbledhim gjithë fëmijët e rrugës

do t’i çojmë në shtëpi e do t’u hapim dyert

dhe do të ikim t’i biem rreth e qark botës

dhe rrugës së ikjes do të takojmë çdo njeri

një vakt do ta hamë tok me të varfrit

do të hedhim pas krahësh çdo inat e mëri

një dolli do ta ngremë edhe me të pasurit

kur peshku të ngordhë në akuarium

dhe murin ta mbulojë myshku i zi

ne do të marrim vetëm kujtimet

dhe do të ikim për të ardhur përsëri

Posto një koment